Eure Präsi luegt (no einisch) zrugg …
„Liecht und Schatte“ so heisst dr Gedichtband wo my Vater Franz, (au) e sehr guete und treff- sichere Schütz, in de 80 er Johr uuseghe het.
Und so cha me au d Schiesssaison 2023 vom Schiessverein Zunzge Tennike beschrybe.
So hei mir s 43. Büchelschiesse wieder uf alle Distanze erfolgrych chönne dureführe.
By dere Glägeheit hei mir au eusi neui, schöni und modärni Chuchi mit eusem neue Wirtepaar Sa- bine und Marcel Bruhin chönne yweihe! Danke an Stefan, Chrigel, Ernst und Pascal.
Voll motiviert hei mir denn au am Putztag im April eusi Heflete so richtig „uusegmischtet“ und zwee Mulde voll Material abgfüehrt! Het das guet do!
Im Frühlig hei mir denn au no chönne der 80. Geburtstag vom Markus Nyffeler und dr 90. Geburts- tag vom Herbert Schweitzer fyre.
Am 20. Juni het denn aber d Saison 2023 mit em starke Gwittersturm e unerwarteti Wendi gnoh! Dur das Naturereignis isch’s Dach vo dr Schützestube bis zum 50m-Stand abdeckt worde und so isch e grosse Wasserschade entstande. De Zwischefall, so churz vor dr Summerpause, het dr Schiessbetrieb vor allem vo de Pischtoleschütze stark beyträchtigt.
Wie mir jetz jo alli wüsse isch dr Schade – verbunde mit vill Nebegrüsch afänglich mit der Gebäu- deversicherig und spöter mit em Dachdecker – jetz zum Glück behobe … und d Schützestube strahlt mit neuem Bode und gstrychene Wänd in neuem Glanz! Glück im Unglück oder Ende gut alles gut !
Dr Bsuech vom KSF AG 300m und em KSF OW 50/25m, verbunde mit em jewylige gmüetliche Uusklang im Garte vom Präsi, ghört sicher zu de gsellige Highlights im Juni.
Und im August … was isch das für es „geils“ Fescht gsi! 700 JOOR Zunzge hei mir gfyret. Mit em Hard – Team hei mir d Feschtbeiz „Schützehuus Restaurant Hard“ sehr erfolgrych betrybe. Euse Helferinne / Helfer herzliche Dank für de tolli Ysatz!
Au fyre hei mir mit Adrian wieder chönne. Sy Doppel SM – Titel hei mir mit em Empfang uf em Dorfplatz gwürdiget und by sym Rieseerfolg – Gwünn vo dr Bronzemedaille an dr CSIM WM in Rio – isch e Delegation vo eus sogar uf Chlote zum fyrliche Empfang gfahre. Au an dr WM in Baku het dr Adi mit sym tolle 18. Rang zmitts in dr Wältelite sehr guet abgschnitte. Eifach toll, was dr Adi do immer wieder leischtet!
Stolz dörfe au eusi Pistoleschütze uf ihri Leischtige si, hei si doch eimol mehr am Final GMS 25m chönne teilneh und sich dört unter de 10 beschte Gruppe platziert. Au bym Final vo der Mann- schaftsmeisterschaft hei si nüt lo abrenne und souverän 2 x Gold gholt! Super!
Leider hei mir in dem Johr au müesse Abschied neh vo eusem liebe Schützekamerad und ver- dienstvolle Ehremitglied Leo Stauffenegger. Dr Leo het grosse Aateil gha am Ufbou vo dr Pistole- sektion Zunzge und am Büchelschiesse Pistole. Mir verliere mit ihm e ganz e liebe Mönsch und Schützekamerad. Sys Wirke und syni Persönlichkeit blybe unvergesse!
S’ Johr 2024 lit vor eus. Es warte mit em 44. Büchelschiesse, mit em Feldschiesse in dr Heflete und mit em Johresschiesse vo de Schützeveterane im Herbscht drei „Grossaläss“ uf eus. … und im Juni stoht jo no dr Bsuech vom KSF GR (hoffentlich im schöne Val Müstair) uf em Programm. Also do wird’s eus bestimmt nit langwylig!
Und jetz wünsch ich Euch alle und Eure Familie e besinnlichi Wienachtszyt und e guete Rutsch ins Johr 2024 verbunde mit de beschte Wünsch zur Eurer Gsundheit!
Eure Präsi Heiner